Haringingo Francis utoza Rayon Sports ari mu mazi abira nyuma y’inama ikomeye yabaye ku munsi wejo hashize

Ku munsi w’ejo hashize ubuyobozi bw’ikipe ya Rayon Sports bwakoze inama ikomeye yafatiwemo imyanzuro ikomeye abakunzi b’iyi kipe bifuzaga.

Iyi nama yahuje ubuyobozi bwa Rayon Sports ndetse n’abari hafi y’ubuyobozi bwa Rayon Sports, yagombaga kwigirwamo bimwe mu bibazo bimaze iminsi byugarije iyi kipe harimo ikibazo cy’amafaranga kinatuma abakinnyi bamwe n’abamwe banga kugaruka gukora imyitozo, rutahizamu ukomeye iyi kipe ishaka ndetse n’ikibazo cy’umutoza Haringingo Francis utishimiwe na benshi muri iyi kipe.

Imwe mu myanzuro yavuye muri iyi nama yabaye mu ibanga rikomeye cyane, ni uko ubuyobozi bwa Rayon Sports bwemeje ko rutahizamu mushya kuri uyu wa gatanu agomba kuba yamaze gusinya amasezerano muri iyi kipe. Ubuyobozi bwemeje ko bugiye gukora ibishoboka byose bugakubita inzu ibipfunsi ariko kuwa gatanu akaba yamaze kwemezwa.

Mu minsi yashize byavuzwe ko umutoza Haringingo Francis yahawe imikino 3 muri iyi mikino yo kwishyura, atakitwara neza bagahita bamusezerera ariko muri iyi nama bemeje ko Haringingo nta gutegereza ahubwo natsindwa umukino barakina na Musanze FC muri iyi wikendi azahita yirukanwa uko byagenda kose kuko ngo ntibakomeza gutegereza.

Icyateye gufata uyu mwanzuro ni uko iyi kipe ya Musanze FC itari isanzwe itsinda ikipe ya Rayon Sports ariko kugeza ubu ibatsinze byaba ari igisebo gikomeye kuko yaba ibatsinze umukino ubanza ndetse n’uwo kwishyura.

Uyu mukino ubuyobozi bwa Rayon Sports bwateze umutoza Haringingo Francis uzaba kuri iki cyumweru tariki 22 Mutarama 2023 ubere kuri Sitade ya Muhanga aho iyi kipe igiye kuba yakirira imikino yayo mu gihe Sitade y’i Nyamirambo irimo kuvugururwa.