HARAGIRIMANA Dieudonne
Umukino w’ikipe ya Rayon Sports n’ikipe y’Intare FC wari umaze igihe uvugwa cyane, Hamenyekanye igihe ugomba kubera nubwo Intare FC zitaremera gukina uyu mukino.
Ku munsi w’ejo mu masaha y’umugoroba nibwo ishyirahamwe ry’umupira w’amaguru hano mu Rwanda FERWAFA yatangaje umwanzuro wari utegerejwe na benshi ivuga ko uyu mukino ugomba kuba ntakongera kubigarukaho.
Intare FC nyuma yo kumva uyu mwanzuro ntabwo baremera niba uyu mukino bazawukina ukurikije ibyo abayobozi bayo bagenda batangaza ahantu hagiye hatandukanye bavuga ko batumva uku kurengana kwabakorewe cyane ko ngo aribo bari mukuri muri iki kibazo.
FERWAFA muri iyi myanzuro yafashe kuri iki kibazo, yavuze ko igihe umukino uzabera kizamenyekana nyuma ariko amakuru twamenye kandi yizewe ni uko uyu mukino abanyarwanda batagomba kuwutegereza muri iyi minsi ahubwo ugomba kuba nyuma y’icyunamo, bivuze ko ushobora kuba nyuma y’i tariki 14 Mata 2023.
Ibi ntabwo bikuraho imikino ya 1/4 cy’igikombe cy’Amahoro giteganyijwe kuri uyu wa gatatu aho amakipe arimo APR FC, Marine FC, Kiyovu Sports, Mukura Victory Sports, Musanze FC, Rwamagana City zigomba gukina ntagihindutse. Police FC yo itegereje ikipe izava hagati ya Rayon Sports n’Intare FC.
