Haaland ejo ku cyumweru azaba ahanganye na Virgir Van Dijk wa Liverpool uzaba ufite akazi gakomeye ko kumuhagarika

Mu mikino ya shampiyona y’Abongereza yo ku munsi wa 10, kuri iki Cyumweru, Liverpool izakira Manchester City isigaye ikomeye bigoranye gutsinda.

Mu myaka 6 ishize, Liverpool niyo izwiho guhanganira igikombe cya shampiyona na Manchester City, gusa uyu mwaka w’imikino kuva watangira ntiyorohewe n’ibihe kuko iri kunganya no gutsindwa kurusha gutsinda.

Mu mikino umunani ya shampiyona Liverpool imaze gukina, yatsinzemo imikino 2, inganya imikino 4, itsindwa imikino ibiri harimo n’uwo iheruka gutsindwa na Arsenal ibitego 3-2 n’uwo yatsizwemo na Manchester United ibitego 2-1.

Ni mu gihe Manchester City yo mu mikino 9 ya shampiyona, yanganyijemo imikino 2, igatsinda imikino 7 yo iri hejuru y’ikipe ya Liverpool mu kwitwara neza.

Abakinnyi ba Liverpool bari kurangwa n’imvune cyane kuko hari abakinnyi benshi batazagaragara kuri uyu mukino kandi bajyaga bifashishwa mu gutsinda Manchester City barimo: Naby Keita, Alex Oxlade-Chamberlain, Luis Diaz, Arthur Melo, Joel Matip na Trent Alexander-Arnold wavunikiye ku mukino w’Arsenal.