Kubwayo Mc croix
Rutahizamu w’umwongereza uca ku mpande Jadon Sancho w’imyaka 23 y’amavuko ni umwe mu mpano zari zitezweho byinshi aza mu ikipe ya Manchester United avuye muri Borussia Dortmund muri 2021. Uyu musore ariko ntibyamugendekeye neza kuko mu mikino 82 amaze gukinira Manchester United, yayitsindiye ibitego 12 atanga imipira 6 yavuyemo ibitego.
Mu kwezi gushize kwa Nzeri nibwo Jadon Sancho yashwanye n’umutoza we Erik Ten Hag, hari ku mukino Manchester United yari yakiriwe na Arsenal wanarangiye Arsenal itsinze ibitego 3-1 tariki 3 Nzeri 2023. Kuri uyu mukino Jadon Sancho ntiyagaragaye mu bakinnyi Manchester United yagombaga gukoresha nyamara ntamvune yarafite. Nyuma y’umukino Erik Ten Hag yavuze ko impamvu Jadon Sancho atagaragaye ku mukino w’Arsenal ari uko tari yitwaye neza mu myitozo. Ibi ariko Jadon Sancho yagiye ku mbugankoranyambaga ze maze arabivuguruza ndetse atangaza ko hari indi impamvu yatumye adakinishwa gusa adashaka guhita avuga.
Kuva icyo gihe Jadon Sancho ntarongera kugaragara mu mukino n’umwe akinira Manchester United arinayo mpamvu ngo uyu musore agomba gusohoka muri iyi kipe muri Mutarama.
Amakipe nka Chelsea, FC Barcelona n’amakipe yo muri Saudi Arabia ni amwe muyifuza gutizwa uyu musore, ariko ubu ku ruhembe hari ikipe ya Juventus yo mu Butaliyani ko ariyo yifuza kusinyisha uyu musore muri Mutarama 2024 nk’intizanyo.
