Fally Ipupa yihanganishije imiryango yabuze ababo kubera imfu zatewe n’umubyigano ukabije wabereye mu gitaramo cye

Umuhanzi Fally Ipupa yihanganishije imiryango y’abantu 11 bapfiriye mu gitaramo yakoreye i Kinshasa muri Repubulika Iharanira Demokarasi ya Congo kubera umubyigano ukabije watumye babura umwuka.

Ku wa Gatandatu nibwo Fally Ipupa uri mu bahanzi bagezweho muri Afurika yakoreye igitaramo i Kinshasa muri stade izwi nka ‘Stade des Martyrs’, gusa ibyari byishimo biza kurangira bihindutse amarira kuko hapfuye abantu 11.

Bivugwa ko izi mpfu zatewe n’umubyigano ukabije cyane ko bivugwa ko abari muri iyi stade bari barenze umubare w’abo yakira ujya urenga abantu ibihumbi 80.