M.Ben
Nshuti Divine Muheto ni umwe mu bakobwa 70 bari guhatanira ikamba rya Miss Rwanda 2022, uyu mukobwa hakomeje kuba impaka nyinshi mu bantu aho bibaza ikintu kizafasha hagati y’ubwiza n’umushinga we muri iri rushanwa ry’ubwiza.
Umushinga wa Nshuti Muheto Divine
Muheto yahize guhashya ubukene ahereye mu bakiri bato, ahamya ko aramutse yegukanye ikamba yakangurira urubyiruko by’umwihariko abakiri bato kwizigama. Avuga ko ibyo azabikora igihe yaba agize amahirwe akegukana iryo kamba.
Uyu mukobwa avuga ko ari umushinga azacisha muri gahunda ye yise ‘Igiceri Youth Program’, bizafasha urubyiruko n’abakiri bato kwizigamira amafaranga yose ashoboka kabone niyo yaba ari igiceri. Uwo mushinga ni wo azifashisha kugira ngo arebe ko yakegukana kuba Nyampinga uruta abandi bose mu Rwanda.
Uyu mushinga wa Muheto azawushyira mu bikorwa binyuze mu bukangurambaga ateganya gukora mu bigo by’amashuri akazanifashisha ibinyamakuru n’imbuga nkoranyambaga.
Uburanga bwa Nshuti Muheto Divine
Nshuti Muheto Divine ni umukobwa ufite uburanga budasanzwe dore ko uburanga bwe bwanatangaje, Mutesi Jolly, umwe mu bagize akanama nkemurampaka muri iri rushanwa rya Miss Rwanda 2022.
Mutesi Jolly akibona Nshuti Muheto Divine bwa mbere yagize amarangamutima muri we indani nuko maze niyayihererana ahita ayasohora hanze, yahise abwira Muheto amarangamutima ye, ati: “Muheto uri mwiza pe! Ibintu byatumye ahita akundwa n’abatari bake.
Kugeza ubu Nshuti Muheto Divine ari mu bakobwa bari guhabwa amahirwe menshi cyane yo kuba baba Miss Rwanda 2022 kubera uburanga bwe, dore ko hari n’abadahwema kuvuga ko ari we Miss wabo yatorwa atatorwa.
Uyu mukobwa ni umwe mu biyamamarije guhagararira Intara y’Iburengerazuba, akaba umwe mu bagarutsweho cyane ku mbuga nkoranyambaga kubera ubwiza bwe byanatumye benshi bahamya ko Nyampinga yabonetse.
Bamwe mu bakurikira irushanwa rya Miss Rwanda batekereje ko uburyo uyu mukobwa yakiriwe ku mbuga nkoranyambaga bishobora kumushyira ku gitutu, icyakora we si ko abibona.
Muheto yavuze ko icyizere yagiriwe n’abakurikira iri rushanwa kimutera imbaraga nyinshi zo gukomeza guhatana.
Muheto ufite nimero 44 ni umwe mu bakobwa 70 bari guhatanira imyanya 20 yo kuzinjira mu mwiherero wa Miss Rwanda 2022. Byitezwe ko aba bazamenyekana ku wa 26 Gashyantare 2022, kuri ubu bakaba bakomeje amatora yo gushakisha babiri bazinjira mu mwiherero ko bahize abandi amajwi.
