Social Mula
Nkuko bisanzwe, irushanwa rimenyerewe nka Miss Rwanda rigamije gutoranya umukobwa uhiga abandi mu bwiza, ubwenge ndetse n’umuco mu Rwanda, rirarimbanyije aho riri kuba ku nshuro yaryo ya 12.
Miss Rwanda igamije ahanini kubakira ubushobozi abakobwa baryitabira, guteza imbere umuco Nyarwanda ndetse no kuwumenyekanisha ku rwego mpuzamahanga cyane cyane mu gihe uwatwaye iri rushanwa ahagarariye u Rwanda mu yandi marushanwa y’ubwiza ku rwego mpuzamahanga.
Mu muhango wabaye mu Kuboza 2021 ugahuza abategura Miss Rwanda n’abafatanyabikorwa biri rushanwa, umuvugizi wa Rwanda Inspiration Back Up itegura Miss Rwanda, Miss Nimwiza Meghan yavuze ko iri rushanwa ryagiriye akamaro abakobwa baryitabiriye mu bihe bitandukanye, atanga ingero z’abakobwa ryafunguriye amarembo, bamwe baba ba rwiyemezamirimo, abandi bahindurira ubuzima sosiyete n’ibindi.
Uko iri rushanwa ryagiye riba umwaka ku wundi, ni nako ryagiye ritera imbere. Ibi bikaba bigaragazwa n’ingano y’ibihembo yagiye yiyongera kugeza aho ubu utwaye iri rushanwa ahabwa imodoka itiyoroheje mu biciro ndetse n’umushahara wa buri kwezi ugera ku bihumbi 800 yu Rwanda. Ibi bihembo kandi byiyongeraho ibindi bitangwa na companyi zitandukanye zitera inkunga iki gikorwa.
Kuzamura agaciro kwiri rushanwa byatumye ibyatangiye bigamije gutinyura abari n’abategarugori bihinduka igikorwa cy’isibaniro ku baryitabira bagamije kurikuramo amikoro. Kugeza ubu, bivugwa yuko gutwara iri rushwanwa bikaba bitagisaba kuba uri mwiza, ufite umuco, n’ubwenge gusa, ahubwo iyo ufite uwo muziranye mubaritegura, ufite ukuvugira, cyangwa se ukaba ufite igishoro, amahirwe yawe yo kuritwara agenda azamuka kugeza aho iri rushanwa riba uzaryegukana azwi.
Bimwe mu bigaragara bikibazwaho na benshi ni ibiba ku munsi wa nyuma wo gutora Miss Rwanda. Muri 2020, byafashe akanama nkemurampaka igihe kingana n’isaha n’iminota 40 bari gutoranya ugomba guhabwa ikamba ndetse n’abamwugiriza. Aha wakwibaza uti akanama nkemurampaka kagizwe n’abantu 5 kajyaga impaka zo kuruhe rwego mu gihe kingana n’amasaha asaga 2. Byari mu mwiherero kandi kugeza ubu ntawe uravamo ngo atangaze icyo bajyagaho impaka gusa byarangiye Nishimwe Naomie ariwe wegukanye ikamba.
Tukiri aho kandi wakwibaza impamvu Miss Naomie atahawe ikamba rya Miss popularity kandi ariwe warufite amajwi menshi yaba kuri SMS ndetse no kuri interineti, yewe urebye no mu bantu uyu mukobwa niwe warukunzwe cyane. Iri kamba rya Miss popularity ahubwo ryaje guhabwa Irasubiza Alliance warufite amajwi make kuri Naomie. Uhereye aho ushobora gukeka icyo akanama nkemurampaka katinze kari kujyaho impaka.
Bamwe mu bakobwa bitabira iri rushanwa bagenda binubira bimwe mubitagenda neza, harimo itangwa rya ruswa kugirango utambuke mu kiciro runaka ndetse no kuba utagira aho ugera igihe nta muntu waba ubikubereyemo ngo agufashe mu buryo bwo kugusunika.
Hari n’abamwe mu bakobwa kandi binubira uburyo biyamamariza iwabo bagatwarwa amahirwe n’abakobwa benshi baturuka mu mujyi wa Kigali bakaza gushakira amahirwe mu ntara.
Mu minsi mike ishize, umwe mubakozi ba Miss Rwanda umaze igihe kinini akora muriri rushanwa witwa Rukundo Patrick uzwi nka Patycope yanditse ku rubuga rwa Twitter ko atakiri kubarizwa muri iryo rushanwa ndetse ko agiye gushyira ukuri kose hanze kubiriberamo. Bavuga ko nta mugabo wisubira ku ijambo, ariko kuri iyi nshuro siko byagenze, abantu batunguwe no kuba yarahise asiba ubwo butumwa ndetse akaba yarakomeje akazi ke nkuko bisanzwe muri iri rushanwa rikomeje aho bari gushaka abakobwa bagomba guhagararira intara n’umujyi wa Kigali.
Ntawavuga ko iri rushanwa ridafite akamaro mu guteza imbere umwana w’umukobwa mu Rwanda ndetse rikagira n’akamaro mu gutanga akazi kubarikoramo ariko na none hari byinshi birivugwamo bitari byiza, gusa yaba abarikoramo ndetse n’abakobwa baryitabira ntawurajya ku karubanda ngo avuge ukuri kwibibera muri iri rushanwa. Ese ibivugwa kuri iri rushwanwa byaba ari ukuri cyangwa ni ibinyoma bigamije kurica intege?
Niba hari andi makuru y’isumbuye wumva wadusangiza kuri iri rushanwa watwandikira tukazayasangiza abakunzi ba Yegob mu nkuru zacu zitaha.
