THIERRY Mugiraneza
Ikipe ya Manchester City yandagaje Liverpool , iyitsinda ibitego bine kuri kimwe mu mukino wo ku munsi wa 28 muri shampiyona y’ikiciro cya mbere mu Bwongereza ( Premier League) , wabaye uyu munsi kuwa Gatandatu.
Abakunzi b’umupira w’amaguru bari bamaze igihe banyotewe n’igaruka ry’amashampiyona , kubera hakinwaga imikino y’ibihugu.
Uyu munsi ku isaha ya Saa Saba n’Igice ikipe ya Manchester City kuri Etihad Stadium yari yakiriye Liverpool. Ni umukino Pep Guardiola,utoza City yaburagamo Haaland naho Jürgen we akaba yari yagaruye abakinnyi bamwe na bamwe.
Abakinnyi ba Manchester City bari babanje mu kibuga ni : Ederson, Stones, Akanji, Dias, Ake, Rodrigo, Gundogan, De Bruyne, Mahrez, Grealish na Alvarez.
Umukino watangiye Liverpool ariyo irimbere cyane kuko ku munota wa 17 gusa Mohamed Salah, yatsinze igitego cya mbere ahawe umupira na Diogo Jota.
Liverpool yo yari yitwaje :Alisson, Alexander-Arnold, Konate, Van Dijk, Robertson, Fabinho, Henderson, Elliott, Salah, Gakpo na Jota.
Manchester City ñyuma yo gutsindwa igitego yakomeje igerageza gushaka uburyo yakwishyura. Ku munota wa 28 Julian Alvarez yaje gutsinda igitego ahawe umupira na Jack Grealish.
Igice cya mbere kirangira ari igitego kimwe kuri kimwe.
Igice cya kabiri cyatangiye Manchester City yataka cyane , maze bidatinze ku munota wa 47 Kevin De Bruyne atsinda igitego cya kabiri ahawe umupira na Mahrez.
Ku munota wa 54 , Manchester City yatsinze igitego cya gatatu gitsinzwe na Ilkaly Gundogan.
Manchester City ku munota wa 74 yatsinze igitego cya 4, gutsinzwe na Jack Grealish ahawe umupira na Kevin Debruyne.
Umukino waje kurangira Manchester City inyagiye ibitego bine kuri kimwe.
