HARAGIRIMANA Dieudonne
AC Milan yasinyishije umukinnyi wa Chelsea ukina mu kibuga hagati, Ruben Loftus-Cheek, amasezerano ye akaba azamara imyaka ine muri iyi kipe ibarizwa mu mujyi wa Milan mu gace ka Madonina.
Uyu mukinnyi ngo yifuzwaga n’amakipe abiri ubuyobozi bwa Chelsea butavuze amazina. Gusa AC Milan yo yari imukeneye cyane kuko yatangaga Miliyoni 15€ ikongeraho n’andi ahabwa ikipe iyo umukinnyi yitwaye neza.
Uyu mukinnyi w’imyaka 27 y’amavuko yatangiye gukinira i Stanford Bridge kuva akiri muto.
Ruben Loftus-Cheek mu mikino 155 yakinnye muri Chelsea, yatsinze ibitego birindwi, yatwaye English Premier League ebyiri, UEFA champions league imwe na FIFA Club world Cup imwe.
Uyu mukinnyi umaze gutwara ibikombe 10 mu mateka ye, yagiye atizwa mu makipe atandukanye arimo Crystal Palace na Fulham.
Ku mbuga nkoranyambaga za Chelsea, yavuze ko Ruben Loftus-Cheek ari umukinnyi mwiza haba mu kibuga no mu myitwarire. Chelsea yasoje yifuriza Ruben Loftus-Cheek kuzahirwa mu buzima bushya ahinduye.
