Kubwayo Mc croix
Irushanwa rya TotalEnergies CAF African Nations Championship (CHAN) 2024, rizaba kuva tariki ya 1 kugeza kuya 28 Gashyantare 2025, rikazabera mu bihugu bitatu bya Kenya, Uganda, na Tanzania. Ni ku nshuro ya munani iri rushanwa ritegurwa, rikazahuza amakipe agizwe n’abakinnyi bakinira imbere mu bihugu byabo.
Tombola y’uko amakipe azahura muri CHAN 2024 izabera muri Kenyatta International Convention Centre (KICC) i Nairobi, Kenya, ku wa 15 Mutarama 2025 saa mbiri z’ijoro ku isaha ya Nairobi (19h00 i Kigali). Iyi tombola izagaragaza uko amakipe 16 azahura mu matsinda.
CHAN ni urubuga rwagaragaje impano nshya mu mupira w’amaguru, nk’urugero rwa Lamine Camara, wegukanye igihembo cya CAF nk’Umukinnyi Muto Mwiza wa 2024 nyuma yo kwitwara neza muri CHAN ya 2022. Iri rushanwa kandi ryitezweho gukomeza kuzamura izina rya Afurika mu mupira w’amaguru no gutegura abakiri bato kuzagera ku rwego mpuzamahanga.
Mu makipe azitabira, harimo na Senegal ifite igikombe cya CHAN giheruka, yatwaye itsinze Algeria mu mukino wa nyuma mu 2022. Abakunzi b’umupira w’amaguru bategerezanyije amatsiko kureba uko iri rushanwa rizakomeza guteza imbere impano z’abakinnyi b’imbere mu bihugu byabo.
Ni inshuro ya kabiri CHAN ibereye muri Afurika y’Iburasirazuba, kuko muri 2016 u Rwanda rwari rwakiriye iri rushanwa ku nshuro ya kane. Icyo gihe, Repubulika Iharanira Demokarasi ya Congo (RD Congo) ni yo yegukanye igikombe itsinze Mali ibitego 3-0 mu mukino wa nyuma wabereye kuri Stade Amahoro i Kigali.
