Chairman wa APR FC, Lt Gen Mubarak Muganga ari kumwe na Maj Gen Eric Murokore basuye abakinnyi ba APR FC bahishura akayabo bazabaha nibanyagira Rayon Sports ifite Abanyamahanga badashoboye (AMAFOTO)

Ku mugoroba w’ejo ku wa Gatanu tariki 10 Gashyantare 2023 Chairman Lt Gen Mubarak Muganga wa APR FC, ari kumwe na Maj Gen Murokore basuye APR FC bayiha impanuro mbere yo gukina na Rayon Sports.

Mu gihe habura amasaha abarirwa ku ntoki ngo rwambikane hagati y’ikipe ya APR FC na Rayon Sports iyi kipe yahawe impanuro ziganisha ku ntsinzi dore ko APR FC gutsinda buri mukino ariyo ntego ya mbere.

Mu mpanuro yahaye iyi Kipe Chairman wa APR FC, yongeye kubibutsa ko Umunyarwanda aho ari hose arangwa n’intsinzi bityo rero abakinnyi nabo bagomba gukomeza kubyerekana nk’uko bakomeje kubigaragaza mu mikino yabanje batsinda.

Yagize ati: umwanya wacu wa mbere tuwuriho kandi aho twavuye hararangiye ubu n’ukureba imbere neza rero n’ugukomeza dutsinda kuko aho umunyarwanda ari hose atozwa gukomeza kwerekeza imbere nta gusubira inyuma ni mutsinde bariya bakinnyi bavuye imihanda yose nk’uko mu mikino yabanje mwabatsinze no ku cyumweru mwongere mubyerekane kandi tubizeyeho iyo ntsinzi.

Twe nk’ubuyobozi tubari inyuma ibyo tubagomba byose byarakozwe kandi muhishiwe n’ibindi”.

Maj Gen Eric MUROKORE mu mpanuro yahaye abakinnyi yongeye kubibutsa ko amahirwe bayafite mu biganza byabo ko aribo bagomba gutanga intsinzi.

Maj Gen Eric MUROKORE yongeye kwibutsa abakinnyi ko amahirwe ari mu Biganza byabo
Yagize ati “turi hano ngo twongere tubatere ingabo mu bitugu mwongere muduhe intsinzi nk’uko mwagiye mubitumenyereza n’ubu rero umukino mufite ku Cyumweru tubizeyeho kuduha ibyishimo kuko amahirwe ari mu biganza byanyu dufite bagenzi bacu bari hirya no hino ku isi navuga Central Africa, Mozambique n’ahandi bose babategerejeho inkuru nziza muri uriya mukino kandi mbizeyeho ubushobozi.

Iriya kipe ifite abakinnyi benshi bakomoka mu bihugu bitandukanye ariko mwebwe muri abenegihugu muri ishema ry’u Rwanda ni inshuro nyinshi mwatsinze, abo bakinnyi bava imihanda yose bari barimo nta cyababuza kongera kubatsinda kuko muri intoranwa, mbifurije intsinzi”.

APR FC irakira Rayon Sports kuri iki Cyumweru mu Karere ka Huye ku isaha yi Saa Cyenda zuzuye (15:00Hrs).