Byibuze abantu 6 bapfiriye mu muvundo wabereye hanze ya sitade Olembe, mu gihe abarenga 40 bakomeretse

Ku wa mbere tariki ya 24 Mutarama 2022, abantu batandatu bapfiriye mu muvundo wabereye hanze ya sitade Olembe yari yakiriye umukino wahuzaga ikipe y’igihugu ya Cameroon na Comoros.

Uyu muvundo wabaye mu gihe imbaga y’abantu yarwaniraga kugera kuri Stade Olembe iherereye mu murwa mukuru wa Cameroon ‘Yaounde’, yari yakiriye umukino wa Cameroon na Comoros mu gikombe cya Afurika.

Abayobozi mu bitaro bya Messassi hafi aho bavuze ko bakiriye byibuze abantu 40 bakomeretse, abajyanwe mu bitaro bari abapolisi n’abasivili. Aba bayobozi bavuze ko ibitaro bidashoboye kubavura bose.

Ishyirahamwe ry’umupira w’amaguru muri Afurika (CAF) riyobora Igikombe cya Afurika, mu itangazo ryatangaje rivuga ko bagiye gukora ipereza.

Ati: “Muri iki gihe CAF iri gukora iperereza ku kibazo kandi igerageza gushaka ibisobanuro birambuye ku byabaye.” “Turi gukorana na guverinoma ya Cameroon na Komite ishinzwe gutegura.”

Itangazo rivuga ko umwe mu bayobozi bakuru ba federation akaba n’umunyamabanga mukuru, Veron Mosengo-Omba yagiye gusura abafana bakomeretse mu bitaro.