M.Ben
Umuyobozi w’Ikipe ya APR FC, Lt Gen Mubarakh Muganga, bwa mbere yemeje ko iyi kipe izongeramo abakinnyi b’abanyamahanga niramuka isohokeye igihugu mu mukino nyafurika.
Ibi yabitangaje mu kiganiro yagiranye na IGIHE nyuma yo gusoza igice cya mbere cya shampiyona y’u Rwanda.
Asubiza ku kibazo cyo kuzana abakinnyi b’abanyamahanga yagize Ati: “…ku ruhando rw’Akarere cyangwa urundi tujya guhataniramo, ibyo ni byo rwose twatangiye gutekereza ko igihe cyose tuzashobora kubonera itike idutwara hanze, ntibizatubuza gushakamo amaraso yandi, umuntu umwe cyangwa babiri, tukajyana muri urwo rugamba rwo gushaka kure hashoboka, aho tugarukiye, wa mugani wa ya mvugo ngo ‘indege ntizima’, aho izajya izimira ubwo izajya izimana n’abanyamahanga bagende, tugaruke nk’Abanyarwanda.”
Akomeza agira ati: “Nitwongera tukayatsa ikagenda, twongere tubahe ‘lift’ cyangwa baduhe ‘lift’ ariko ni twe tubaha ‘lift’ kuko turi abakoresha. Tujyane muri urwo rugamba, aho duhagarariye bagende, tugaruke kuko twe mu Rwanda twumva politiki yo gukinisha abanyamahanga nka APR, iyo twarayisezereye.”
Imyaka 10 irashize APR FC yarashyizeho politiki yo gukinisha abakinnyi b’Abanyarwanda kuko abanyamahanga bayiherukamo mu mwaka wa 2012.
