HARAGIRIMANA Dieudonne
Umugabo uzwi ku izina rya Anthony Lefredo umaze kumenyekana nka ‘Black Alien project’ we yahisemo guhindura umubiri we nk’uw’inyamanswa, aho yishyuye umuganga ngo amuhindure Alien y’umukara (Black Alien).
Anthony ukomoka mu Bufaransa, ku myaka 24 yahisemo kureka akazi yakoraga nk’ushinzwe umutekano. Avuga ko yamenye ko abaho ubuzima atifuza kubaho, afata utwe yerekeza muri Australia aho atamaze kabiri kuko yahise agaruka iwabo mu burayi.
Uyu mugabo yaje gufata icyemezo cyo guhinduza umubiri we wose umukara ndetse akuraho bimwe mu bice bye b’umubiri aho izuru n’amatwi ndetse n’ibitsike byakuweho hanyuma amaso ye nayo ayahinduza umukara akoresheje ibyo bakunze kwita ‘Tattoo’.
Ururimi narwo yarusatujemo aruhindura icyatsi kibisi. Akuraho umunwa ibyo avuga ko byatumye agorwa no kongera kuvuga ariko ntibyamuca intege, ndetse kuri ubu intoki ebyiri zo ku kiganza kimwe zikaba zaramaze kuvanwaho.
Uyu mugabo kuri ubu ufite imyaka 33 avuga ko impamvu adacika intege kuri uyu mushinga we umeze nko kwiyahura ari uko arimo kubaho ubuzima bw’inzozi ze, akaba kandi yifuza no kuzakuraho uruhu rwe agashyiraho urw’icyuma.
