Birababaje: Umusore yitabye Imana yari ari kwitegura ubukwe muri uku kwezi

Umusore ukiri muto wari ufite ubukwe muri uku kwezi yagonzwe n’imodoka ahitashiramo umwuka.

Ibi byabereye mu Murenge wa Ruhango mu karere ka Ruhango imbere ya gare (aho bategera imodoka) ya Ruhango, ubwo uwo musore wari utwaye igare ririho ibijumba yaje kugongwa n’ikamyo agahita ahasiga ubuzima.

Imyirondoro y’uwo musore yerekana ko yitwa Kwizera Philbert, akaba yakoraga akazi ku bunyonzi muri ako Karere ka Ruhango.

Abaturage bari ahongaho babajwe bikomeye n’urupfu rw’uwo musore ndetse banavuga ko uyu musore yari afite ubukwe muri uku kwezi dore ko ngo yari yaramaze gusezerana imbere y’amategeko.

Abashoferi bari batwaye iyo kamyo bakimara kugonga uwo musore bashatse gutoroka ngo bacike, gusa ariko abaturage bababera ibamba banga ko bagenda kugeza igihe inzego z’umutekano zageraga ahabereye ibyo.

Abaturage baganiriye na BTN Tv dukesha iyi nkuru banenze abanyamagare kubera ukuntu baba bagenda muri uwo muhanda, ndetse kandi banasabye Leta gushyira utugabanya umuvuduko muri uwo muhanda kubera ukuntu ngo ukemeje gutwara ubuzima bw’abatari bake.

Umurambo wa Kwizera Philbert wahise ujyanwa mu bitaro bya Kinazi, mu gihe abashoferi bo bahise bajyanwa kuri sitasiyo ya Polisi ikorera mu karere ka Ruhango.