Bidasubirwaho ikipe yo mu Rwanda yakoze amateka yo gusinyisha rutahizamu wakiniye Hull City yo mu Bwongereza

Ikipe ya AS Muhanga ibarizwa muri shampiyona y’Icyiciro cya Kabiri mu Rwanda yamaze gusinyisha rutahizamu Mpuzamahanga ukomoka mu gihugu cy’u Burundi witwa Ngama Emmanuel.

Ku gicamunsi cy’ejo ku wa Kabiri tariki 24 Mutarama 2023, nibwo AS Muhanga yasinyishije Ngama Emmanuel amasezerano y’amezi atandatu azarangirana n’umwaka w’imikino wa 2022-2023.

Uyu rutahizamu aje gufasha iyi kipe itozwa na Mbarushimana Abdou kuzamuka iva mu Cyiciro cya Kabiri igana mu Cyiciro cya Mbere mu mwaka w’imikino wa 2023-2024.

Ngama Emmanuel w’imyaka 34 y’amavuko yakiniye amakipe AO Bujumbura, AFC Leopards, Mukura Victory Sports, Tusker FC, OC Bukavu Dawa na Gwambina FC yo muri Zambia, yigeze no kunyura muri Hull City yo mu Bwongereza ayikinira amezi abiri.