M.Ben
Imwe mu nkuru zagarutsweho cyane mu mikino ya Shampiyona yabaye ku wa Gatanu, tariki 27 Ukwakira 2023, ni ibura ry’umuriro ubwo Kiyovu Sports yanyagiraga Etoile de l’Est ibitego 6-1 kuri Kigali Pelé Stadium.
Ubwo umukino wari ugeze ku munota wa 27, Abayovu bari kwishimira igitego cya kabiri cyatsinzwe na Sherif Bayo, umuriro wahise ugenda stade yose irijima. Nyuma y’iminota hafi itanu wagarutse ariko urumuri ari ruke kuko hakaga amatara make cyane.
Umukino warakomeje, ariko nyuma y’iminota mike, nyuma y’igitego cya gatatu cyatsinzwe na Mugunga Yves ku munota wa 34, umuriro wongeye urabura.
Kuri iyi nshuro wamaze akanya kagera mu minota irenga itanu utaragaruka. Wagarutse noneho amatara yose yaka neza bigaragara ko bari bamaze kuyashyira ku muyoboro wa moteri. Ibyabaye byatumye umusifuzi yongeraho iminota 15 mbere y’uko igice cya mbere kirangira.
Abari muri Kigali Pelé Stadium bahuzaga iki kibazo n’ubukene buri muri Kiyovu Sports bavuga ko igeze n’aho kubura amafaranga ya mazutu.
Amakuru twamenye ni uko Urucaca rwari rwishyuye amafaranga ya mazutu binyuze kuri konti iri muri BNR nk’uko bisabwa n’amategeko ahubwo na bo batazi ikibazo cyabayeho.
Umukozi ushinzwe gucunga stade yabwiye IGIHE ko ikibazo cyabayeho cyatumye umuriro ubura inshuro ebyiri kandi hagati mu mukino.
Yagize ati “Twatangiye gupima amatara saa Cyenda tubona nta kibazo. Nyuma umukino watangiye haje kubamo ikibazo cyo gukura ku muriro usanzwe wa REG dushyira kuri moteri. Ikindi cyaje kugaragara ndetse cyafashe umwanya, ni batiri ya moteri yagize ikibazo byatumye idakora neza.”
Mu busanzwe, amategeko y’Ishyirahamwe rya Ruhago mu Rwanda, FERWAFA , avuga ko mu gihe cy’umukino amatara agomba gucanirwa kuri moteri kuko umuriro wa REG utizewe.
Ikipe yakiriye isabwa kugura litilo 300 za mazutu zigomba gukoreshwa mu masaha atatu. Bivuze ko muri iyi minsi ikipe isabwa kwishyura agera ku bihumbi 500 Frw.
