M.Ben
Ibiciro by’ibikomoka kuri peteroli byatumbagiye kubera ibitero byagabwe muri Israel n’Umutwe wo muri Palestine ubarizwa mu gace ka Gaza, Hamas, byatumye icyo gihugu na cyo kigerageza kwirwanaho no gutangaza ko kiri mu ntambara.
Nubwo muri Israel na Palestine atari ahantu hacukurwa peteroli biravugwa ko ku kagunguru hamaze kuzamukaho amadorali atatu.
Ibitero bya Hamas kuri Israel byagabwe ku wa Gatandatu mu buryo butunguranye aho uwo mutwe warashe ibisasu birenga 5000 byatumye abantu banyuranye bahasiga ubuzima abandi barakomereka.
Ibyo byatumye Israel igaba ibitero mu gace ka Gaza ahari ibirindiro by’uwo mutwe ndetse itangaza ko yinjiye mu ntambara, dore ko abaturage batari bake bashimuswe n’abarwanyi b’uwo mutwe.
Iyi ntambara ishobora guhindura isura cyane ko ibihugu bitandukanye byamaze gufata uruhande, aho Israel ishyigikiwe na Leta Zunze Ubumwe za Amerika mu gihe Iran n’ibindi bihugu byo mu Burasirazuba bwo Hagati biri no mu bicukura peteroli nyinshi biri inyuma ya Palestine.
Ku Cyumweru, tariki ya 8 Ukwakira 2023, Iran yahakanye ibyo ishinjwa byo kuba inyuma y’Umutwe wa Hamas imbere y’Akanama ka Loni gashinzwe Umutekano, nubwo Perezida w’iki gihugu Ebrahim Raisi yagaragaje ko bashyigikiye ibitero byagabwe.
Umusesenguzi mu birebana n’Ingufu, Saul Kavonic, yavuze ko ibikomoka kuri peteroli byazamutse bitewe n’uko umwuka mubi hagati y’ibi bihugu ushobora kugira ingaruka no ku bicukura peteroli nyinshi birimo Iran na Arabie Saoudite.
Yagize ati “Mu gihe umwuka mubi waba urimo na Iran, ishinjwa gutera inkunga ibitero bya Hamas, bivuze ko nibura 3% bya peteroli icuruzwa ku Isi yahita ihungabana.”
Ku rundi ruhande hari umusezenguzi mu by’ubukungu wabwiye BBC ko Iran yamaze kuzamura ibiciro by’umusaruro w’ibikomoka kuri peteroli bigendanye n’ibihano iki gihugu cyafatiwe na Amerika.
