Epaphrodite Nsengimana
Umutoza wa Rayon Sports FC, Yamen Zelfan yatukanye n’abafana bayo imbona nkubone ku mukino yanganyijemo na Marines FC ibitego 2-2.
Kutavuga rumwe n’umutoza byageze no kuri myugariro Mitima Isaac utamushyigikiraga ku byo ari gukora. Ariko Zelfani nk’uwari ufite umwanzuro wa nyuma abakuramo bombi abasimbuza Aboubakar Mgadam na Mugisha Francois ‘Master’.
Abafana ba Rayon Sports bose bahise bagaragaza ko batishimiye impinduka akoze, mu ijwi riri hejuru cyane Malayika wihebeye iyi kipe we agira ati “tubura itike yo kugera mu matsinda nanone ni uku wabigenje, kutumvikana n’abakinnyi ni byo bitugejeje aha. Utuvire mu ikipe.”
Umutoza ntiyihanganiye bamwe mu bafana barimo Malayika ahubwo nawe yiyambuye umwambaro w’ubutoza ajya gusubizanya nawe bisaba ko abashinzwe umutekano bajya gukura umufana mu nzira.
Umukino urangiye Yamen Zelfan arimo agana mu rwambariro bakomeje kumukurikiza amagambo nawe asubizanya nabo kugeza aho abapolisi aribo bahagobotse bakamwingingira kubava imbere ubona ko atabyifuza.
