THIERRY Mugiraneza
Ikipe ya Arsenal yanganyije na Newcastle United ubusa ku busa mu mukino w’ umunsi wa 18 wa Premier League.
Uyu mukino wabaye mu ijoro ryo kuwa kabiri ubera kuri sitade ya Arsenal, Emirates Stadium. Uyu mukino wagiye gutangira amakipe yombi ahagaze neza dore ko Arsenal yari iyoboye urutonde n’aho Newcastle United yari ku mwanya wa gatatu.
Arsenal yaherukaga gutsinda Brighton ibitego bine kuri bibiri nta bwo yahiriwe n’uyu mukino kuko yahize igitego hasi kubura hejuru kikabura.
Mikel Ariteta utoza Arsenal yari yitabaje abakinnyi nka Ramsdale, White, Saliba, Gabriel, Zinchenko, Xhaka, Partey, Saka, Odegaard, Martinelli na Nketiah.
Mu gihe Newcastle yari yabanje mu kibuga Pope, Trippier, Botman, Schar, Burn, Willock, Longstaff, Guimaraes, Almiron, Wilson na Joelinton.
Uy mukino waranzwe n’amahari ku mpande zombi kuko umukino wose wabonetsemo amakarita 9 y’umuhondo. Harimo 4 yahawe abakinnyi ba Arsenal biganjemo Nketiah, Odeggard, Xhaka na Zinchenko.
Newcastle United yo yahawe amakarita 5 y’umuhondo yahawe Guimaraes, Wilson, Joelinton, Almiron na Lascelles.
Ñyuma y’uko Arsenal inaniwe kwikiranura na Newcastle urutonde rw’agateganyo rwa Championa nta bwo rwahindutse cyane kuko n’ubundi Arsenal yagumye iyoboye urutonde n’amanota 44 mu mikino 17 imaze gukina n’aho Newcastle United yagumye ku mwanya wa gatatu n’amanota 35 n’ibitego 21 izigamye.
