Kubwayo Mc croix
Ikipe ya APR FC yitwaye neza isezera AS Kigali ku bitego 2-0, mu mukino wa ½ cy’Igikombe cy’Intwari wabaye kuri uyu wa Kabiri, tariki 28 Mutarama 2025. Ibitego bya APR FC byatsinzwe na Denis Omedi na Niyibizi Ramadhan, maze iyi kipe yambara umweru n’umukara yegukana itike yo gukina umukino wa nyuma.
APR FC yihariye umukino guhera ku minota ya mbere, igaragaza imbaraga n’umurongo wo gushaka intsinzi. Mu gice cya mbere, nubwo habonetse amahirwe menshi yombi, amakipe yombi ntabwo yigeze abasha kubona igitego, igice cya mbere kirangira ari 0-0.
Icyakora, igice cya kabiri cyatangiranye imbaraga, aho APR FC yahise ifata icyerekezo cy’umukino. Ku munota wa 55, umusifuzi yatanze penaliti ku ikosa ryakorewe muri metero 18 na Akayezu Jean Bosco wa AS Kigali. Ku munota wa 58, Denis Omedi yahise afungura amazamu kuri penaliti, aba atsinze igitego cye cya mbere muri APR FC, biba ibyishimo ku bafana bayo.
Nyuma yo gutsindwa igitego cya mbere, AS Kigali yakoze impinduka zitandukanye, yinjiza abakinnyi nka Ndayishimiye Didier na Abubakar Saidi mu rwego rwo gushaka kwisubiza umukino, ariko ntibyagira icyo bitanga. Ku munota wa 80, Niyibizi Ramadhan yatsinze igitego cya kabiri nyuma yo guterana ishoti rikomeye ku kufura, umuzamu wa AS Kigali Cyuzuzo Aimé Gaël abura aho umupira unyuze.
AS Kigali yakomeje kugerageza kotsa igitutu APR FC, ariko ba myugariro ba APR FC nka Niyigena Clément na Ruboneka Claude bakomeza gukina neza bashaka kwirinda gutakaza umusaruro bari bamaze kugeraho.
Iyi ntsinzi yahise ituma APR FC ijya ku mukino wa nyuma w’Igikombe cy’Intwari, aho itegereje ikipe iza gukomeza hagati ya Police FC na Rayon Sports, zihura mu mukino wa kabiri wa ½.
Ikipe ya APR FC iragaragaza icyizere cyo kwegukana iki gikombe, hashingiwe ku mikinire yihariye yagaragaje muri uyu mukino.
