APR FC yanenze ikinyamakuru gikomeye hano mu Rwanda nyuma yo gutangaza inkuru y’ikinyoma

Ubuyobozi bwa APR F.C bwanyomoje ibivugwa ko iri mu biganiro n’Umutoza Florent Ibenge ngo aze kuyitoza, kuko ibyo bitigeze bibaho, bikaba ari ibihimbano bigera ku bitangazamakuru, tukaba kandi tutaranamenya impamvu biza iteka biciye ahantu hamwe ku igihe.com.

APR F.C ni ikipe yubaha Itangazamakuru kandi ishima umusanzu waryo mu iterambere ry’umupira w’amaguru. Ibi byanatumye yubaka uburyo bw’imikorere idaheza uwo ari we wese ku makuru ayerekeyeho (ndetse igihe.com nta minsi irenze 04 Chairman avuganye na bo).

Nta gitangazamakuru twatoza uburyo bw’imikorere ariko ni ngombwa ko amakuru avugwa muri APR F.C kandi afitiye Abanyarwanda akamaro aba ari aturutse k’Umuvugizi wayo cyangwa mu buyobozi bwayo.

Tuboneyeho gusaba abakunzi ba APR F.C n’Abanyarwanda muri rusange kudaha agaciro ibihuha byose biza bivugwamo ikipe yabo, bagakomeza kwizera inzego zishinzwe kubagezaho amakuru nyayo.