APR FC yafashe icyemezo gikomeye cyo gutiza undi mukinnyi wayo wayifashaga asanga 4 boherejwe mbere muri Marine FC

Ikipe ya APR FC nyuma yo kohereza abakinnyi 4 muri Marine FC yongeyeho na Nizeyimana Djuma ashinjwa umusaruro udahagije.

Kuwa mbere w’iki cyumweru tariki ya 8 Mutarama 2022, byavuzwe ko ikipe ya APR FC yamaze gutiza Marine FC abakinnyi barimo Nsanzimfura Keddy, Mbonyumwami Thaiba, Nkundimana Fabio ndetse na Hirwa Jean De Dieu ariko ntabwo iyi kipe iremeza ko aba bakinnyi yaba yabarekuye nkuko bitangazwa n’aba bakinnyi ubwabo.

Nyuma yaba bakinnyi bivugwa ko bazakinira ikipe ya Marine FC muri iyi mikino yo kwishyura, hiyongereyemo na Nizeyimana Djuma wanakiniye imikino myinshi ikipe ya APR FC, amakuru dufite ni uko umusaruro w’uyu mukinnyi ntabwo washimwe cyane n’abatoza b’iyi kipe bayobowe na Ben Moussa nk’umutoza mukuru.

Marine FC ibyayo bikomeje kuyoberana bitewe nuko iyi kipe bigoye kuzabona amanota ikeneye kugirango yizere ko izaguma mu cyiciro cya mbere bigoranye cyane kuko isabwa kubona nibura amanota 23 kugirango yuzuze amanota 30 yayizeza kuguma muri iki cyiciro. Gusa aba bakinnyi ihawe ni abakinnyi beza bashobora kuzayifasha cyane ko ntawushidikanya k’ubushobozi bwabo.