Kubwayo Mc croix
Ku wa Gatatu Saa Kumi n’Ebyiri, APR FC irakira Bugesera FC kuri Kigali Pelé Stadium mu mukino w’ikirarane cy’umunsi wa kabiri wa shampiyona y’icyiciro cya mbere mu Rwanda. Uyu mukino ufite agaciro kadasanzwe ku mutoza wa Bugesera FC, Haringingo Christian Francis, uri mu mazi abira.
Amakuru yizewe avuga ko ubuyobozi bwa Bugesera FC bwamumenyesheje ko agomba kubona amanota atandatu mu mikino itatu yakurikiranye, harimo uwo baheruka gutsindwamo na Vision FC (2-1), uwa APR FC, n’uwo bazakina na Muhazi United. Kutsindwa na APR FC bivuze ko aya manota atandatu ataba akibashije kuboneka, bikaba byahita bituma Haringingo asezererwa.
Kugeza ubu, Bugesera FC iri ku mwanya wa 13 n’amanota umunani, inganya na Etincelles FC ya 15, ikarusha amanota abiri Kiyovu Sports iri ku mwanya wa nyuma. Haringingo yageze muri Bugesera FC umwaka ushize asimbuye Eric Nshimiyimana, agasinya amasezerano y’umwaka n’igice.
