Epaphrodite Nsengimana
Kuri uyu wa Gatatu tariki 6 Nzeri 2023, byari amarira n’agahinda mu muhango wo gusezera bwa nyuma Ngirinshuti Innocent n’umuhungu we Mugisha Nshuti Miguel, mu muhango wabereye muri Paruwasi Gatolika ya Kicukiro.
Innocent n’umwana we Miguel, bazize impanuka yabaye ku wa Gatandatu tariki ya 2 Nzeri 203, aho imodoka yakoze impanuka igeze mu Murenge wa Kigali ku muhanda uva i Nyamirambo ugana Ruliba, bageze ahazwi nka Norvège imodoka igacika feri irenga umuhanda abantu 6 bahita bapfa, abandi bagakomereka.
Iyi modoka yo mu bwoko bwa ‘minibus’ yakoze impanuka, yari iturutse i Kigali irimo umuryango wihurije hamwe ugiye gusura benewabo batuye mu karere ka Kamonyi.
Iyo mpanuka ikamara kuba abantu 6 bahise bahasiga ubuzima barimo Ngirinshuti Innocent w’imyaka 43 n’umwana we Mugisha Nshuti Miguel w’imyaka 5, Mpinganzima Sylvia wa 32, Undoyeneza Venantie wari ufite 42, Alvin w’irindwi na Musoni Olivier wa 11.
Abari muri iyi modoka bafitanye isano naho Ngirinshuti n’umuhungu we bayiguyemo bari inshuti z’uyu muryango, bari bagiye kwifatanya na bo.
