Amarira n’agahinda byari byose ku bakinnyi ba Ukraine ubwo isosi yagwamo inshishi.

Mu mujyi wa Cardiff niho hari habereye umukino wo gushaka itike yo kwerekeza mu gikombe cy’isi, aho Ukraine yakinaga na Wales.

Uyu mukino warangiye ari igitego kimwe cya Wales nabwo umukinnyi wa Ukraine yitsinze, bituma inzozi zabo zishyirwaho iherezo amahirwe yo kwerekeza muri Qatar atangira aho.

Ubwo umukino warangiraga abakinnyi bose bagiye gushimira abafana babo babashije kugira urugendo bava muri Ukraine bakagera I Cardiff ari benshi kuko bari 2000 bose.

Roman Yaremchuk byamunaniye kwihangana amarira atema ku matama nk’umwana muto ubwo yashimiraga abafana bari bigomwe byinshi bakaza kubashyigikira.

Ukraine yagiye gukina na Wales imaze gukina umukino wa mbere aho yahuye na Scotland bikarangira iyitsinze.