Amakuru agezweho ku iburanishwa rya Titi Brown – nonaha

Umubyinnyi Titi Brown abwiye Urukiko ko atazi umuntu wafashe amashusho yatanzwe n’Ubushinjacyaha, agaragaza ari kubyinana n’uwo mwana wahawe izina rya “MJ”

Titi yongeyeho ko atemeranya n’Ubushinjacyaha ko ayo mashusho yafatiwe aho yari atuye, kandi ko Ubushinjacyaha butatanze ibimenyetso by’uko yafatiwe iwe.

Maitre Mbonyimpaye wunganira Titi Brown mu Rukiko arengejeho ko konti ku mbuga nkoranyambaga zahererekanyije aya mashusho ziyitiriye Titi n’uwo mwana, ko atari bo bwite bazikoreye.

Mbonyimpaye asanga biteye impungenge kuba Ubushinjacyaha butarahawe uruhushya n’Umushinjacyaha mukuru mbere yo kuyatanga mu Rukiko nk’Ikimenyetso gishya, mu kirego cya Titi Brown.