Kubwayo Mc croix
Impuzamashyirahamwe y’umupira w’amaguru muri Afurika (CAF) yatangaje ko yongereye amafaranga agenerwa amakipe yitabira amarushanwa nyafurika ya CAF Champions League na CAF Confederation Cup, mu rwego rwo guteza imbere umupira w’amaguru ku mugabane wa Afurika no kugabanya icyuho kiri hagati y’amakipe akomeye n’andi matoya.
Ku wa 16 Kanama 2024, CAF yatangaje ko buri kipe izajya itangira imikino y’ijonjora rya mbere (Preliminary Round) muri CAF Champions League ndetse na CAF Confederation Cup izajya ihabwa inkunga ingana na $50,000, ni ukuvuga asaga miliyoni 70 Frw. Iyi ni gahunda nshya ije bwa mbere mu mateka y’aya marushanwa, igamije gufasha amakipe kuba yabona ubushobozi bwo gutegura neza imikino, kugura ibikoresho no kwishyura ingendo.
Uretse iyi nkunga ya $50,000, CAF yanatangaje ko ibihembo bihabwa amakipe agera kure mu marushanwa byazamutseho 40%. Muri CAF Champions League, ikipe yegukanye igikombe izajya ihabwa $4,000,000 ivuye kuri $2.5M, iya kabiri ihabwe $2,000,000, abageze muri 1/2 bahabwe $1,200,000 naho abageze muri 1/4 bahabwe $900,000. N’abarangije ku mwanya wa gatatu n’uwa kane mu matsinda bazajya bahabwa $700,000.
Muri CAF Confederation Cup, ikipe yegukanye igikombe izajya ihabwa $2,000,000, iya kabiri $1,000,000, abageze muri 1/2 bahabwe $750,000, abageze muri 1/4 bahabwe $550,000 naho abarangije ku mwanya wa gatatu n’uwa kane mu matsinda bahabwe $400,000.
Umuyobozi wa CAF, Dr. Patrice Motsepe, yavuze ko aya mavugurura agamije gushyigikira iterambere rirambye ry’umupira w’amaguru muri Afurika, by’umwihariko ku makipe y’ibihugu bikiri mu nzira y’amajyambere. Yagize ati: “Dushaka ko buri kipe yitabira amarushanwa yacu yisanzuye, idafite umuzigo w’imyenda cyangwa ikibazo cy’ubushobozi. Ibi ni intambwe ikomeye mu guteza imbere ruhago yacu.”
Iyi gahunda izafasha amakipe atandukanye mu gutegura neza amarushanwa, no kuzamura urwego rwabo haba mu kibuga no hanze yacyo. Ni igikorwa gishimangira icyerekezo gishya cya CAF mu gukomeza kwegereza amahirwe yose amakipe yo muri Afurika yose, hatitawe ku rwego cyangwa ubushobozi bwayo.
