HARAGIRIMANA Dieudonne
Umukinnyi Sadio Mane yashyize hanze amabanga aherutse kongorera umunya-Misiri, Mohamed Salah basanzwe bakinana muri Liverpool yo mu Bwongereza; nyuma y’umukino wa nyuma w’Igikombe cya Afurika Sénégal yatsinzemo Misiri.
Ku Cyumweru gishize ni bwo Ikipe y’Igihugu ya Sénégal, Les Lions de la Téranga yegukanye Igikombe cya Afurika ku ncuro ya mbere itsinze Les Pharaohs ya Misiri kuri Penaliti 4-2.
Ni nyuma y’uko iminota isanzwe y’umukino na 30 yo guca impaka yari yarangiye amakipe yombi anganya 0-0.
Ubwo umukino wari urangiye Sadio Mané yagaragaye hari amagambo asa n’uwongorera Mohamed Salah warangije umukino arira.
Uyu munya-Sénégal, yavuze ko yabwiraga Salah ko kuba atsindiwe ku mukino wa nyuma atari ryo herezo.
Ati: “Namubwiye ko akiri umukinnyi ukomeye, kandi ko ari iby’agaciro gukinana na we mu ikipe imwe. Ndamwubaha cyane kandi yatanze buri kimwe ku gihugu cye, gusa ku bw’amahirwe make ntabwo yatsinze, ariko ntibivuze ko byari birangiye kuri we.”
Sadio Mané yunzemo ati: “Namubwiye kandi ko afite byinshi byo gutsindira, birimo igikombe cya Afurika cya 2023. Bafite ikipe y’abakinnyi bakiri bato, birashoboka ko bazagitwara umunsi umwe.”
