Afite ubumuga bwo kutabona: Umuhanzikazi w’imyaka 12 arasaba ubufasha Butera Knowless na Bruce Melodie

Umuhanzikazi ukiri muto ufite impano itangaje, wiga mu karere ka Rwamagana, arasaba abahanzi afata nk’ikitegererezo (Role model) kumufasha impano y’umuziki yifitemo ikamuhindurira ubuzima.

Agahozo Baho Vitus w’imyaka 12, wiga mu kigo cya HVP Gatagara ishuri ryigisha abafite ubumuga bwo kutabona riherereye mu murenge wa Kigabiro mu karere ka Rwamagana, yabwiye InyaRwanda dukesha iyi nkuru ko afite impano y’umuziki akaba anifuza  kuzacungura nyina n’abavandimwe bariho mu buzima butamushimisha.

Yavuze ko amaze gukora indirimbo ebyiri zakorewe amashusho ndetse akaba afite indirimbo nyinshi zitarasohoka kubera amikoro kuko avuka mu muryango ukennye.

Yavuze ko yifuza gukorana indirimbo n’abahanzi bane afata nk’ikitegererezo mu muziki (Role model), abo bahanzi ku isonga haza Bruce Melodie kuko akunda uburyo aririmba neza. Umuhanzi wa kabiri yifuza ko bakorana indirimbo ni Butera Knowless.

Agira ati: “Abahanzi nkunda buri wese numva dukoranye indirimbo byamfasha kuko maze gutangira umuziki natangiye ndirimba ku buzima bwanjye ni bwo nakoze indimbo nka “Nyambutsa” na “Dukundane” ndetse hari izindi.

Iyo ndirimba numva nishimye ariko mfite intego ko umuziki nkora uzamfasha nkafasha mama wanjye nabo tuvukana kuva mu buzima budashimishije kuko mama wanjye navutse ntabona aranyitangira ariko we n’abo tuvukana ntibabayeho neza kandi ari njye mwana mukuru mu rugo abandi ni bato ntabwo bafasha mama wanjye.”