Abakinnyi babiri bakomeye b’ikipe izasohokera u Rwanda mu mikino Nyafurika basanzwemo COVID-19

Abakinnyi babiri b’ikipe ya AS Kigali izahagararira u Rwanda mu irushanwa rya CAF Confederations Cup basanzwemo icyorezo cya COVID-19.

Iyi kipe ifite urugendo rugana mu gihugu cya Djibouti ahazabera umukino ubanza mu ijonjora rya mbere ry’imikino ya CAF Confederation Cup 2022-2023. Ikipe ngari ya AS Kigali izahaguruka kuri uyu wa Gatatu saa saba z’igicuku (1:00 PM).

Amakuru dukesha umunyamakuru w’imikino Ngabo Roben ukorera Radio 1 ni uko myugariro w’ibumoso Dusingizimana Gilbert na rutahizamu Mpuzamahanga ukomoka mu gihugu cya Cameroon witwa Man Ykree Dangmo basanzwemo icyorezo cya COVID-19.

Aba bakinnyi ntabwo barahagurukana n’abandi imyanya yabo ikaba irahita ijyamo Kayitaba Jean Bosco na Akayezu Jean de Dieu.

Biteganyijwe ko umukino ubanza uzabera muri Djibouti tariki ya 10 Nzeri 2022 ku kibuga cya Stade du Ville ni mu gihe umukino wo kwishyura uzabera mu Rwanda tariki ya 18 Nzeri 2022.