Abakinnyi 2 bakomeye ba Real Madrid basanzwemo Coronavirus.

Ikipe ya Real Madrid yakiriye inkuru mbi mu gitondo cyo kuri uyu wa Gatandatu tariki ya 07 Ugushyingo 2020, ibamenyesha ko abakinnyi bayo babiri barimo Umubiligi Eden Hazard wari waratangiye kugaruka mu kibuga n’umunya-Brazil Casemiro banduye icyorezo cya Coronavirus.

Hazard na Casemiro biyongereye kuri Eder Militao wasanganwe iki cyorezo mu cyumweru gishize, aba bakinnyi bose bakaba batazagaragara ku mukino wa shampiyona Real Madrid izakina na Valencia iwayo ku cyumweru tariki ya 08 Ugushyingo 2020.

Gusa abandi bakinnyi b’iyi kipe, Abatoza ndetse n’abandi bakozi bayo bose basanze ari bazima.

Itangazo ryasohotse mu gitondo cyo kuri uyu wa Gatandatu riragira riti: “Real Madrid irabamenyesha ko abakinnyi bacu aribo Casemiro na Hazard banduye COVID-19 mu bizamini byafashwe mu gitondo cyo ku wa Gatanu”.

“Ibizamini byafashwe miri iki gitondo byagaragaje ko uretse Casemiro na Hazard, abandi bakinnyi, abatoza ndetse n’abakozi b’ikipe bose ari bazima”.

Uretse Casemiro, Hazard na Militao banduye Coronavirus, abandi bakinnyi barimo Dani Carvajal, Alvaro Odriozola na Nacho, nabo ntibazagaragara ku mukino wa valencia kubera imvune.

Real Madrid imaze gukina imikino 7 muri shampiyona ya Espagne ‘La Liga’ iri ku mwanya wa kabiri n’amanota 16, ikaba yaratsinze imikino 5, inganya umwe, itsindwa undi mukino.