Abafana ba Leicester City bandikiye FA y’Ubwongereza bayisaba gukora iperereza ku mukinnyi wa Leicester

Abafana ba Leicester City bandikiye ishyirahamwe ry’umupira w’amaguru mu Bwongereza ( Football Association) basaba ko yakora iperereza ku mukinnyi wabo witsinze ibitego bibiri mu mukino wabahuje na Liverpool.

Mu ijoro ryo Kuwa gatanu ushize nibwo ikipe ya Liverpool yatsindaga Leicester City ibitego bibiri kuri kimwe nyamara Liverpool itarigeze itsinda igitego na kimwe mu izamu ryayo kuko ibitego bibiri byose bya Liverpool byabonetse ubwo Wout Faes wa Leicester City yabyitsindaga ku munota wa 38 n’umunota wa 45.
Nyuma y’uwo mukino abafana ba Leicester City batiyumvishaga uburyo umuntu yakwitsinda ibitego bibiri wenyine bahise bandikira ishyirahamwe ry’umupira w’amaguru mu Bwongereza (Football Association) bayisaba guperereza ngo irebe niba Wout Faes atari yateze cq ngo hari indi mpamvu.

Wout Faes yabaye umukinnyi wa kane witsinze ibitego bibiri mu mukino umwe wa Premier League kuko mbere abakinnyi bari baritsinze ibitego bibiri mu mukino umwe bari Jamie Carragher wabyitsinze mu 1999 ubwo Liverpool yakinaga na Manchester United, Micheal Proctor na we yabyitsinze muri 2003 ubwo Sunderland yakinaga na Charlton uwaherukaga kwitera ibitego bibiri mu mukino umwe ni Jonathan Walters muri 2013 ubwo Stoke City yakinaga na Chelsea.