Abafana ba Al-Ittihad iheruka gutsinda Al-Nassr, igikorwa bakoze cyarakaje Cristiano Ronaldo maze umujinya awutura uducupa tw’amazi

Cristiano Ronaldo yagaragaje umujinya w’umuranduranzuzi ubwo ikipe ye ya Al-Nassr yari imaze gutsindirwa ku kibuga k’ikipe ya Al- ittihad igitego 1-0 maze abafana b’iyi kipe batangira kuririmba izina rya mukeba wa Cristiano bavuga bati ‘Lionel Messi’.

Nyuma y’umukino, Ronaldo yagaragaye azunguza umutwe ndetse yirengagiza bagenzi be bakinana bageragezaga kumuturisha gusa ariko akomera amashyi abafana ba Al-Nassr bari babaherekeje hanyuma yinjira mu rwambariro,akuramo igitambaro cy’ubukapiteni ndetse ahondagura imigeri agacupa k’amazi yahuye nako.

Mu mashusho yakwirakwijwe ku mbuga nkoranyambaga,abafana ba Al-Ittihad bumvikanye baririmba ngo “Messi, Messi, Messi” mu rwego rwo kuyaza Ronaldo bamwereka ko bikundira uyu rutahizamu wa Paris Saint-Germain.

Uyu yaje kuzamura ukuboko abereka ko ntacyo bimubwiye ndetse hari aho byageze azamura intungu mu kubereka ko barushywa n’ubusa.

Muri uyu mukino,Ronaldo ntabwo yitwaye neza kuko yateye rimwe mu izamu ndetse n’ikipe ye ntiyigaragaje neza, yatsinzwe igitego cya Romarinho mu gice cya kabiri cyatumye ikipe ya Al-Ittihad ifata umwanya wa mbere muri Saudi Pro League nyuma yo guhigika Al Nassr ya Ronaldo.