Yabanje kwemera icyaha agisabira n’imbabazi, Umugabo watemaguye umugore we kugeza ashizemo umwuka yakaniwe urumukwiye 

Umugabo watemaguye umugore we kugeza ashizemo umwuka yakaniwe urumukwiye.

Ni Urukiko Rwisumbuye rwa Gasabo rwasomye urubanza Ubushinjacyaha bwari bukurikiranyemo umugabo wakoze icyaha cy’Ubwicanyi akagikorera umugore we, rukaba rwarakimuhamije maze rumuhanisha igifungo cya burundu.

Isomwa ry’urubanza ryabereye aho icyaha cyakorewe ku wa 17 Gashyantare 2023. Ni mu rugo rwabo ruherereye mu Mudugudu wa Gikingo, Akagari ka Bweramvura, Umurenge wa Jabana, Akarere ka Gasabo mu Mujyi wa Kigali.

Icyo cyaha cyakozwe ku wa 05Mutarama 2023 saa cyenda z’ijoro, uwo mugabo akaba yaratemye umugore we ahantu hatandukanye ku mubiri we akoresheje umuhoro kugeza apfuye.

Ubushinjacyaha buvuga ko uregwa yemeye icyaha anagisabira imbabazi. Urukiko rwamukatiye gufungwa burundu nk’uko biteganywa mu ngingo ya 107 y’itegeko No 68/2018 ryo ku wa 30/08/2018 riteganya ibyaha n’ibihano muri rusange.