Social Mula
Rutahizamu usatira aciye mu mpande mu ikipe ya APR FC n’Ikipe y’Igihugu Amavubi, Byiringiro Lague ntabwo arahaguruka mu Rwanda uyu munsi ahubwo azagenda tariki 25 Gashyantare 2023.
Hashize ukwezi Byiringiro Lague yumvikanye n’ikipe ya Sandvikens IF ibarizwa muri shampiyona y’Icyiciro cya Gatatu mu gihugu cya Sweden aho agomba kuzayisinyira amasezerano y’imyaka itatu.
Byari biteganyijwe ko uyu mukinnyi ahaguruka mu Rwanda kuri uyu wa Gatatu tariki 15 Gashyantare 2023 ariko urugendo rwe rwigijweho inyuma iminsi 10 yose, azerekeza muri Sweden tariki 25 Gashyantare 2023.
N’ubwo Byiringiro Lague agifite iminsi 10 mu Rwanda, nta w’undi mukino azongera gukinira ikipe ya APR FC, umukino we wa nyuma yakiniye Ikipe y’Ingabo z’Igihugu bawutsinzwemo na mucyeba Rayon Sports igitego kimwe ku busa.
Byiringiro Lague ni umwe mu bakinnyi bafite impano idashidikanywaho ndetse bitezweho kuzagera kure heza hashoboka, akaba yari afite amasezerano y’imyaka itatu muri APR FC mbere y’uko agurwa na Sandvikens IF.
