Umwataka ukomeye wa Rayon Sports arashaka gutandukana n’iyi kipe kubera amafaranga

Umwataka wa Rayon Sports Musa Esenu arashaka gutandukana nayo kubera ko itubahirije ibyo bumvikanye ubwo yayisinyiraga.

Amakuru dukesha ISIMBI ni uko Musa Esenu atahawe amafaranga yose yaguzwe dore ko yahawe igice andi akabwirwa ko azayahabwa nyuma.

Esenu yaguzwe miliyoni 5, muri izo 5 yaje guhabwa miliyoni 2.8 ikipe imusigaramo miliyoni 2.2.

Shampiyona ikaba yarasojwe Rayon Sports imufitiye amezi 2 y’umushahara itaramwishyura uhwanye na miliyoni imwe, yose hamwe akaba yishyuza Rayon Sports 3,200,000 frw.

Nyuma y’uko shampiyona irangiye Esenu yababajwe n’uko yasabye iyi kipe amafaranga,  akaza guhabwa ibihumbi 200 by’amafaranga y’u Rwanda ariko akaba yaranze kuyafata ahitamo kugenda nta n’igiceri afite.

Kugeza ubu Esenu ari kwitegura gutandukana na Rayon Sports mu gihe cyose baba batamwishyuye amafaranga yose bamurimo.

Rayon Sports irimo Musa Esenu amafaranga agera kuri miliyoni 3,200,000 by’amafaranga y’u Rwanda.

Musa Esenu yaje muri Rayon Sports mu ntangiriro z’uyu mwaka, akaba asigaje igihe kingana n’umwaka umwe n’igice muri Rayon Sports.