Umuzamu Hakizimana Adolphe na rutahizamu Essomba Onana barahabwa agahimbazamusyi karuta aka bagenzi babo

Umuzamu Hakizimana Adolphe na rutahizamu Mpuzamahanga ukomoka mu gihugu cya Cameroon, Essomba Leandre Willy Onana barahabwa agahimbazamusyi kangana n’ibihumbi 100 by’Amanyarwanda, mu gihe bagenzi babo bo barahabwa ibihumbi 50.

Ku gicamunsi cyo kuri iki Cyumweru tariki 5 Werurwe 2023, nibwo ikipe ya Rayon Sports yatsindaga Etincelles FC ibitego bibiri ku busa mu mukino w’umunsi wa 22 wa shampiyona y’Icyiciro cya Mbere umwaka w’imikino wa 2022-2023.

Ibitego bya Rayon Sports byatsinzwe na Joachiam Ojera na Essomba Leandre Willy Onana.

Gutsinda uyu mukino ubuyobozi bwa Rayon Sports bwari bwemereye buri mukinnyi ko arahabwa ibihumbi 50 by’Amanyarwanda, gusa kuri Hakizimana Adolphe na Essomba Onana bo barahabwa andi bitewe n’uko bageze ku ntego zabo.

Amakuru YEGOB yamenye ni uko iyo Hakizimana Adolphe asoje umukino atinjijwe igitego ahabwa ibihumbi 50, ni nako Essomba Onana iyo atsinze igitego ahabwa ibihumbi 50, aya mafaranga bakaba bayahabwa n’abafana ba Rayon Sports baba hanze y’u Rwanda.

Ikipe ya Rayon Sports nyuma yo gutsinda Etincelles FC yahise ifata umwanya wa kabiri n’amanota 45 inyuma ya APR FC ifite amanota 46, mu gihe Kiyovu Sports iri ku mwanya wa gatatu n’amanota 44, Etincelles FC yo yagumye ku mwanya wa 7 n’amanota 34.