Umutoza Haringingo yakoze impinduka zikomeye mu bakinnyi 11 ba Rayon Sports azabanzamo nyuma yo kubona imyitwarire idasanzwe kuri Onana ushinjwa kuba yaraganirijwe na Eto’o umukozi wa APR FC

Abakinnyi b’ikipe ya Rayon Sports bakomeje gukubita agatoki ku kandi aho bifuza guhindura amateka mabi y’uko bamaze imikino irindwi batazi uko gutsinda APR FC bimera.

Ku Cyumweru tariki 12 Gashyantare 2023, shampiyona y’Icyiciro cya Mbere umwaka w’imikino wa 2022-2023 izaba yakomeje aho kuri Stade Mpuzamahanga y’i Huye ikipe ya APR FC izahakirira Rayon Sports.

APR FC iri ku mwanya wa mbere n’amanota 37, mu gihe Rayon Sports iri ku mwanya wa kane n’amanota 33 ku rutonde rw’agateganyo rwa shampiyona.

Amakuru dukesha Radio 10, ni uko Essomba Leandre Willy Onana ari mu bihe byiza ndetse akaba ari we uzaba ari rutahizamu wo hagati akaba anafite intego zo kuzashengura imitima y’abakunzi ba APR FC, Musa Esenu we azabanza hanze y’ikibuga.

Abakinnyi 11 ba Rayon Sports bazabanzamo

Umuzamu : Hakizimana Adolphe

Ba myugariro : Mucyo Didier’Junior’, Ganijuru Elie, Mitima Isaac na Rwatubyaye Abdul.

Abo hagati : Ngendahimana Eric, Mbirizi Eric na Heritier Luvumbu Nzinga.

Ba rutahizamu : Joachiam Ojera, Essomba Leandre Willy Onana na Iraguha Hadji.

Rayon Sports iheruka gutsinda APR FC tariki 21 Mata 2019, icyo gihe yayitsinze igitego kimwe ku busa cyabonetse ku munota wa nyuma gitsinzwe na Michael Sarpong kuri penaliti nyuma y’ikosa Imanishimwe Emmanuel myugariro wa APR FC yakoreye kuri Mugisha Gilbert wari mu rubuga rw’amahina.