Social Mula
Umutoza mukuru w’ikipe ya Rayon Sports, Haringingo Francis Christian yamaze gufata icyemezo cyo kutazongera kubanza mu kibuga Mugisha Francois bakunze kwita Master.
Uyu mukinnyi wo hagati mu kibuga yari amaze igihe kinini abanza mu kibuga kuva shampiyona y’Icyiciro cya Mbere umwaka w’imikino wa 2022-2023 yatangira aho hamaze gukinwa imikino ine kuri buri kipe havuyemo izifite ibirarane.
Ku gicamunsi cyo ku wa Gatandatu tariki 1 Ukwakira 2022, ubwo ikipe ya Marine FC yari yakiriye Rayon Sports kuri Stade Umuganda iherereye mu Karere ka Rubavu, umukinnyi Mugisha Francois ntabwo yitwaye neza kuko yakoze amakosa yashoboraga kuvamo ibitego byinshi.
N’ubwo uyu mukino warangiye Rayon Sports itsinze Marine FC ibitego bitatu kuri bibiri, harimo bibiri bya Essomba Leandre Willy Onana na kimwe cya Mbirizi Eric, ariko Mugisha Francois yakoze amakosa atandukanye harimo nayavuyemo ibitego bibiri bya Marine FC byatsinzwe na Gitego Arthur na Mugisha Desire.
Amakuru yizewe Yegob yamenye ni uko itsinda ry’abatoza ba Rayon Sports barangajwe imbere na Haringingo Francis Christian bafashe umwanzuro wo kuba bashyize hanze Mugisha Francois akabanza akazazamura urwego rw’imikinire yagaruka ku rwego ruhambaye akaba aribwo yazongera kubanza mu kibuga.
Ubusanzwe Rayon Sports ifite abakinnyi batandukanye bo hagati mu kibuga barimo Umunya-Nigeria Rafael Osaluwe Olise na Nishimwe Blaise basigaye babanza hanze y’ikibuga, umwe muri aba bakinnyi niwe uzajya abanzamo agasimbura Mugisha Francois wari umaze igihe yarafatishije umwanya wo kubanzamo.
Mugisha Francois asigaranye amasezerano y’amezi 9 muri Rayon Sports nyuma yo kuyigarukamo avuye muri Bugesera FC, uyu mukinnyi akaba yarazamukiye muri Isonga FC ayivamo 2015 ubwo yerekezaga muri Rayon Sports akayikinira imyaka ine akajya muri Bugesera akabona kugaruka muri Rayon Sports mu mpeshyi y’umwaka ushize.
Iyi kipe ikomeje kwitegura irushanwa rya Made in Rwanda izahuriramo n’amakipe atatu ariyo Kiyovu Sports, Mukura Victory Sports na Musanze FC, ikipe ya Rayon Sports ikazatangira icakirana na Musanze FC tariki 7 Nzeri 2022 Saa Kumi n’Ebyiri z’umugoroba kuri Stade ya Kigali i Nyamirambo.
