Umutoza Cassa Mbungo yahagaritse abakinnyi b’Abanyarwanda babanza mu kibuga muri AS Kigali bashinjwa icyaha gikomeye

Umutoza mukuru w’ikipe ya AS Kigali, Cassa Mbungo Andre yahagaritse myugariro wo hagati Bishira Latif na Kalisa Rachid ukina hagati mu kibuga.

Kuri uyu wa Kane tariki 9 Gashyantare 2023, nibwo byamenyekanye ko Bishira Latif na Kalisa Rachid bahagaritswe igihe kitazwi mu ikipe ya AS Kigali.

Amakuru dukesha Radio 10 ni uko Kalisa Rachid na Bishira Latif bashinjwa guteza umwuka mubi mu rwambariro no guca ibice mu bakinnyi b’iyi kipe y’Umujyi wa Kigali.

AS Kigali iri ku mwanya wa gatatu n’amanota 33, iheruka gutsindwa imikino ibiri yikurikiranya ya shampiyona harimo uwa Rwamagana City na Police FC.