Umutoza Ben Moussa akomeje kunenga bikomeye ubushobozi bucye bw’abakinnyi batatu ba APR FC

Umutoza mukuru w’ikipe ya APR FC, Ben Moussa akomeje kunenga urwego rw’imikinire rw’abakinnyi batatu b’iyi kipe barimo umuzamu Tuyizere Jean Luc.

N’ubwo Ikipe y’Ingabo z’Igihugu yicaye ku isonga ku rutonde rw’agateganyo rwa shampiyona y’Icyiciro cya Mbere umwaka w’imikino wa 2022-2023 aho ifite amanota 43 mu mikino 21, ariko hari abakinnyi umutoza Ben Moussa ahora asaba gukora cyane ngo bazamure urwego rw’imikinire.

Amakuru yizewe ahari ni uko umutoza Ben Moussa umunsi ku munsi ahora anenga ubushobozi bucye bwa Tuyizere Jean Luc, Nizeyimana Djuma na Kwitonda Alain ‘Baca’.

Aba bakinnyi uko ari batatu mu gihe baba bakomeje gusubira inyuma birashoboka cyane ko iyi kipe ishobora kuzabereka umuryango uyisohokamo.

Kuri uyu wa Gatatu tariki 1 Werurwe 2023, ikipe ya APR FC yatunguwe mu Gikombe cy’Amahoro inganya ubusa ku busa na Ivoire Olympic yo mu Cyiciro cya Kabiri.