Umusore winyweraga urumogi yakubise se isuka y’umutwe

Mu karere ka Nyanza haravugwa inkuru y’umusore uzwiho kunywa itabi rifite ubukana ( urumogi) yakubise se, isuka mu mutwe aramukomeretsa.

Aya mahano yabereye mu murenge wa  Ntyazo mu kagari ka Cyotamakara mu mudugudu wa Bayi, abaturage bahaye amakuru UMUSEKE dukesha iyi nkuru bavuze ko uwo musore yari afitanye amakimbirane yo mu ngo na Se umubyara.

Amakuru avuga ko Nsengiyumva Jonathan w’imyaka 31 y’amavuko uzwiho kwijandika mu nzoga z’inkorano n’urumogi habuze gato ngo yirenze se umubyara witwa Mpayamaguru  w’imyaka 68 y’amavuko.

Umunyamabanga Nshingwabikorwa w’akagari ka Cyotamakara Safari Jean de Dieu yemeje ayo makuru ndetse anavuga ko uwo musore asanzwe yitwara nabi.

Kuri ubu uyu musore yajyanwe kuri sitasiyo ya  RIB iri  Ntyazo,naho se umubyara yajyanwe ku bitaro bya Nyanza ngo yitabweho n’abaganga.