Kubwayo Mc croix
Ku mugoroba wo ku wa Gatanu, tariki ya 1 Ugushyingo 2024, igikorwa kibabaje cyabereye ku kibuga cya Wankulukuku, mu mujyi wa Kampala, aho umukino wa Shampiyona ya Uganda wahuje amakipe ya SC Villa na UPDF wasize umusifuzi Peter Kabugo asize ubuzima bwe mu kibuga. Kabugo, wari umaze imyaka itatu asifura mu Cyiciro cya mbere muri Uganda, yituye hasi mu buryo butunguranye ubwo yari ari mu kazi ko gusifura ku ruhande rw’iburyo, umukino ugeze ku munota wa 73.
Abaganga b’amakipe yombi bahise batabara bagerageza kumuha ubutabazi bw’ibanze, ariko byarangiye hitabajwe imbangukiragutabara kugira ngo imujyane kwa muganga. Gusa ku bw’amahirwe make, yitabye Imana akihagera, ntibabashije kurokora ubuzima bwe.
Kugeza ubu, impamvu y’itabaruka rya Kabugo ntabwo iramenyekana neza, nubwo hari ukekwako ashobora kuba yari afite ikibazo cy’umutima.
