Epaphrodite Nsengimana
Nyinawumuntu Grace, umwe mu batoza bakomeye mu mupira w’amaguru w’abagore mu Rwanda, yagiye gukomereza akazi muri Ottawa Gloucester Hornets, ikipe y’abana yo muri Canada. Iyi kipe ifite amashami y’abahungu n’abakobwa bari hagati y’imyaka itanu na 18.
Uyu mutoza yari amaze imyaka itatu ari Umuyobozi wa Tekinike mu Irerero rya Paris Saint-Germain (PSG) riri i Huye, aho yafashaga abana gukomeza impano zabo muri ruhago. Mbere yaho, yari umutoza wa AS Kigali WFC ndetse n’Ikipe y’Igihugu y’Abagore, aho yagize uruhare rukomeye mu guteza imbere umukino w’abagore mu Rwanda.
Nyinawumuntu afite ibigwi bikomeye nk’umutoza, kuko yegukanye Igikombe cya Shampiyona inshuro umunani ari kumwe na AS Kigali WFC. Ku rwego mpuzamahanga, ubwo yari mu Irerero rya PSG, yayoboye ikipe kwegukana Igikombe cy’Isi gihuza amarero y’iyi kipe inshuro eshatu.
Mu mwaka wa 2013, Nyinawumuntu yahawe igihembo cy’umutoza mwiza w’umwaka, bishimangira ubuhanga bwe mu gutoza. Ubu, akomeje iyo nzira muri Canada, aho azafasha abana gukura neza mu mikinire no gutegura ejo heza mu mupira w’amaguru.
