Umunyamakuru ukunzwe cyane mu mikino i Kigali ntakiri kubarizwa ku butaka bw’u Rwanda ukundi

Umunyamakuru ubirambyemo ndetse akaba n’Umushyushyarugamba ku mikino ya ruhago, Gakuba Felix Abdul Jabar ‘Romalio’ yageze i Dar-es-Salaam muri Tanzania ku butumire bwa Visi Perezida wa Yanga SC, Alafat Hadji aho azaba Umushyushyarugamba ku mukino wo kwishyura Al-Merrikh izakirwamo na Yanga SC tariki 30 Nzeri 2023 kuri Azam Complex Stadium.

Nyuma yo kuyobora neza umukino ubanza Yanga SC yatsinzemo Al-Merrikh ibitego 2-0 kuri Kigali Pelé Stadium tariki 16 Nzeri 2023, ‘Romalio’ ni bwo yabengutswe anahabwa ubutumire nyuma yo kwitwara neza cyane ko asanzwe avuga indimi nyinshi zirimo Ikinyarwanda, Icyongereza, Igiswahili n’Igifaransa.

Romalio azamara i Dar es Salaam iminsi itanu guhera tariki 27 Nzeri kugera ku wa 2 Ukwakira 2023.