THIERRY Mugiraneza
Benni McCarthy, Umunyafurika y’Epfo akaba n’umwe mu bagize itsinda rigari ry’abatoza ba Manchester United, yahishuye icyo yakoze kuri Marcus Rashford cyatumye ubu ari inyenyeri itazima i Burayi.
Benni McCarthy ni umugabo ukomoka muri Afurika y’Epfo, akaba ubu ari umwe mu batoza ba Manchester United aho McCarthy atoza ba rutahizamu ba Manchester United. Benni McCarthy yabaye umukinnyi wakiniye amakipe atandukanye i Burayi arimo FC Porto, Ajax, West Ham na Blackburn Rovers ndetse anakinira Bafana Bafana imikino 79 ayitsindira ibitego 31. Ubu Benni McCarthy ni umugabo w’imyaka 45 y’amavuko akaba yarahawe akazi ko gutoza ba rutahizamu ba Manchester United kuva mu mpeshyi ya 2022.
Kuva Benni McCarthy yahabwa akazi ko gutoza ba rutahizamu ba Manchester United kimwe mu bintu ashimirwa ni ukuba yaratumye Marcus Rashford ahinduka rutahizamu ukomeye i Burayi bwose.
Benni McCarthy ubwo yabazwaga ikintu yafashije Marcus Rashford, Benni McCarthy yasobanuriye abafana ba Manchester United ko yashyize Rashford mu mwanya mwiza ndetse akaba yaragendeye ku bushobozi bwe yahoze afite agikina ruhago n’ubwa Marcus Rashford afite ubu. McCarthy yatangarije abafana ba Manchester United ko yatumye Rashford azamura urwego rwe rw’umuvuduko ndetse n’imbaraga z’imubiri zatuma ahangana n’abandi bakinnyi baba bahanganiye umupira, ikindi ngo yamufashije mu buryo bwo gutsinda.
Kugeza ubu Marcus Rashford niwe mwataka umeze neza i Burayi kuko mu mikino 36 amaze gukina amaze gutsinda ibitego 24 agatanga n’imipira 9 ibyara ibitego. Marcus Rashford mu mikino 17 iheruka amaze gutsinda ibitego 16 atanga imipira ivamo ibitego 6.
