Umunsi wa Mbere w’Itora rya Papa Mushya i Vatikani Warangiye nta Mwanzuro Ufashwe

Ku wa Gatatu tariki ya 7 Gicurasi 2025, imbaga y’abakirisitu yaturutse hirya no hino ku isi yari yakoraniye mu rubuga rwa Mutagatifu Petero (Saint Peter’s Square) i Vatikani, itegereje kureba niba Papa mushya yatorwa ku munsi wa mbere w’itora. Icyakora, ibyiringiro byinshi byarangiye igihe umwotsi w’umukara waturukaga ku gisenge cya Chapelle Sixtine werekanaga ko abakaridinali bataragira uwo bumvikanaho.

‎Nubwo abantu benshi bari bizeye ko bazataha bamenye umushumba mushya wa Kiliziya Gatolika, umwotsi w’umukara ugaragaza ko amatora atari yatanga umusaruro yaje gusohoka saa tatu z’ijoro (9pm), amasaha abiri arenga nyuma y’igihe benshi bari bayiteze.

‎Abakaridinali 133 bafite uburenganzira bwo gutora nibo bari bateraniye mu nama izwi nka conclave, aho bagomba kugera ku bwiganze bwa bibiri bya gatatu (89 kuri 133) kugira ngo haboneke Papa mushya. Amatora yakozwe mu ibanga rikomeye, kandi abakaridinali barahiriye kutagira icyo batangaza ku byo babonye cyangwa bumvise mu gihe cy’itora.

‎Nk’uko byatangajwe na Associated Press, itora ryari ryabanjirijwe n’imihango y’iyinjizwa ry’abakaridinali mu chapelle ya Sixtine, ahabera amatora, ndetse hakurikiraho gusenya burundu imirongo y’itumanaho, mu rwego rwo kurinda ko hagira amakuru atangazwa mbere y’igihe.

‎Nubwo bitari byitezwe ko Papa yatangazwa ku munsi wa mbere, benshi mu bari bateraniye mu rubuga rwa Mutagatifu Petero bari bizeye igitangaza. Hari abakambaga ku butaka, abari bafite abana bato, abandi bambaye imyenda y’iyobokamana ndetse n’abanyamahanga bitwaje ibinyobwa byo kwiyuhagira mu gihe bategereje. Ndetse bamwe bazanye n’imbwa zabo, zatezaga akajagari mu ruhame.

‎Kugeza ubu, abakandida bakomeje kugarukwaho barimo Kardinali Pietro Parolin wo mu Butaliyani, usanzwe ari Umunyamabanga wa Leta wa Vatikani, na Kardinali Luis Antonio Tagle wo muri Filipine, uzwiho kuba umunyabuntu n’umuhanga mu itumanaho ry’abantu.

‎Amatora ateganyijwe gukomeza kuri uyu wa Kane, aho abakaridinali bazongera gutora inshuro ebyiri mu gitondo n’inshuro ebyiri ku gicamunsi, kugeza igihe bazumvikanira kuri Papa mushya.

‎Nubwo abakirisitu batashye batamenye umuyobozi mushya wa Kiliziya, ntibacitse intege. Benshi bagaragaje ko bafite icyizere ko mu minsi iri imbere bazabona umushumba uzabayobora, agakomereza aho Papa Francis yasubikiye umurimo we, nyuma y’urupfu rwe rutunguranye rwabaye tariki ya 21 Mata 2025.