Umukino wahuje Etincelles na AS Kigali abakinnyi bikanze amarozi bituma bakora igikorwa kigayitse cyatumye benshi bagira ubwoba

Umukino wahuje ikipe ya Etincelles FC itozwa na Bizumuremyi Radjab na AS Kigali itozwa na Cassa Mbungo Andrew wagaragayemo ibikorwa byo kwikanga amarozi ku mpande zombi.

Ku gicamunsi cyo kuri uyu wa Gatanu tariki 24 Gashyantare 2023, ikipe ya Etincelles FC yari yakiriye AS Kigali mu mukino w’umunsi wa 21 wa shampiyona y’Icyiciro cya Mbere umwaka w’imikino wa 2022-2023.

Mbere y’uko umukino utangira ikipe ya Etincelles FC yamennye amazi hagati mu kibuga, maze abakinnyi ba Etincelles FC n’aba AS Kigali banga gusuhuzanya nk’uko bisanzwe bikorwa n’amakipe iyo agiye gutangira umukino.

Abakunzi benshi b’umupira w’amaguru banenze aya makipe basaba FERWAFA ko ikipe izongera gukora ibikorwa bigaragaza ko ishyize imbere amarozi yajya ihanwa kuko amarozi mu mupira w’u Rwanda asigaye yarahawe intebe y’icyubahiro mu makipe hafi ya yose nyamara bitanga ishusho mbi ku bana bato bakiri kuzamuka.

Uyu mukino warangiye amakipe yombi anganyije ibitego bibiri kuri bibiri byatumye AS Kigali ihita ifata umwanya wa gatatu n’amanota 38, mu gihe Etincelles FC yagumye ku mwanya wa Gatandatu n’amanota 34.