Umukinnyi wa Rayon Sports yirukanywe mu ikipe y’igihugu ahita asimbuzwa undi w’ikipe ikomeye mu Rwanda

Myugariro ukomeye wo hagati mu ikipe ya Rayon Sports Ndizeye Samuel yamaze gukurwa mu bakinnyi b’ikipe y’igihugu Amavubi asimbuzwa undi myugariro na we ukomeye.

Ubwo Carlos Alós utoza ikipe y’igihugu y’u Rwanda Amavubi yatangazaga urutonde rw’abakinnyi 24 azifashisha mu mikino ibiri afitanye na Ethiopia, abantu batunguwe no kubonaho Ndizeye Samuel kandi yarakiniye ikipe y’igihugu y’u Burundi y’abaterengeje imyaka 23.

Amakuru dukesha RadioTv10 ni uko uyu myugariro wa Rayon Sports, Ndizeye Samuel yamaze gusimburwa na Bishirandora Latif wa As Kigali. Iki cyemezo cyafashwe nyuma yo kubona ko atabona vuba ibyangombwa byo gukinira u Rwanda.

Amavubi azatangira umwiherero ku Cyumweru yitegura umukino ubanza aho Ethiopia izakirira u Rwanda kuri Uwanja wa Mkapa tariki ya 26 Kanama 2022 ni mu gihe uwo kwishyura uzabera mu Rwanda tariki ya 3 Nzeri 2022. CHAN ikaba izabera muri Algeria umwaka utaha.